مر الكلام وعذبه (2)

قالوا ان لجريدة الشرق الكثير من المبادرات في العمل المجتمعي بيّضٍ أياديها، وياما وياما بعد الله فرجت على الناس كربات وتجاوبوا أهل الخير مع مساعيها، وفيه من وقف لله أموال وأسهم وبنايات يبغي تجارة رابحة ما خسارة فيها.. وفيه من تذمر لو طَول الإمام في الصلاة لكن أماكن اللهو ما همه لو قعد شهر فيها!!! وفيه ناس ما تكمل نصف الدوامات ومصالح الناس كيف تخليها؟؟ وفيه من على طول في إجازات والترقية في بيوتها تجيها؟؟ وفيه من يجد ويجتهد في كل المجالات مصلحة العمل يبديها، وفيه من يرقب الترقية من عدة سنوات مسكين ما درى إن التقارير مديره عابثٍ فيها، وفيه من يقول الوظائف للقطريين والقطريات لكن بشروط تعجيزية من يقدر يوفيها؟! وفيه من يريد يرفع سوق العقارات إليّن ذوي الدخل المحدود ما تلقى سكن فيها؟؟ وفيه من يقول انه حافظ لسانه عن الخطأ والزَّلات لكن إذا جاء للمجالس أعراض خلق الله خاض فيها، وفيه من يريد الديمقراطية ومزيد من المشاركات لكن جهل كثيراً من معانيها، وفيه من في المجتمع له بصمات والكثير أصابعه ما من بصمة فيها، وفيه من التجار ما يشبعون من المطالبات ويقولون الصناعية ما بقى أرض فيها، وفيه يقولون أفلام وأغاني وحفلات ألا وا حسرتي لا شفت بعض الشباب مترقصٍّ فيها!! وفيه عندنا برامج متميزة للاختراعات تسلم يد من سعى لخير العرب فيها، وفيه طالبنا بأندية رياضية خاصة للسيدات لكي يجنبهن بإذن الله الأمراض وبلاويها، وتوفر الدولة في المستقبل أموال العلاجات إليّ زاد الصرف فيها، وأيضاً بعض مطاعم الوجبات إلليّ كثير من الدهون المشبعة فيها،،، وفيه من يدخل على الناس الفرح والمسرات وفيه مرٍ وعلقم يسقيها، وفيه من بعد ما عينوه في المنصب اكثروا طلاب الصداقات وبعد ما شَلوه مجالسه خالية محدٍ يجيها!! وفيه من المسئولين إلا جيته ببعض المراجعات يقول نعم لكن ما شيء تاليها؟؟ وفيه ناس لو مثلك لهم معاملات كان وّقعت له بالخط العريض في ثوانيها!! وفيه من البعض من اكثروا في البرامج من الشَّكايات بعضها صدق وبعضها ما أصدقوا فيها، وفيه قالوا الدولة زادت للمشاريع والاعتمادات ياليت أيدي المحاباة والمجاملات ما تجيها؟؟ وفيه قالوا شارع 22 فبرابر زحمة على كل المسارات قلنا الخرائط والرسومات من إليّ مسويها؟! وفيه قالوا قطر قدمت لكثير من الشعوب المساعدات قلنا نعم هذا من صميم مباديها، وفيه اطلعت الفلوس للاكتتابات والرواتب ماعاد زيادة فيها، وفيه قناة الجزيرة تفوقت على كل القنوات أولها وتاليها وفضحت كثير من الممارسات إليّ كان الإعلام الحكومي مغطيها، وفيه قالوا الأخطاء الطبية تحدث في كل المستشفيات قلنا نعم ولكن ليس ابو هامور تاليها، وارجو انه لا أحد يزعل لو أبدينا الملاحظات ما دام الصالح العام هدف فيها.