البيت قديم يا أخوك؟؟

مرحبا وشّ هالصدف الجميلة يا بوابراهيم يوم شفتك/ وأنا أسعد يا بوعلي بشوفتك/ ما شاء الله وشّ هالخرائط والرسومات إللي عندك صرت مستثمر عقاري أشوف الكل صار هالأيام أو للحين ما بنيت أه نسيت عندك بيت شعبي؟؟/ وانت الصادق خبرك البيت قديم وصار عليه هدم وإعادة بناء/ليش إنت للحين ما صرت من كبار الموظفين؟/لا ياخوي قبل لا احصل سنيّر قاعدوني / يا رجال يمكن أحسن لك لوعطوك سنيّر واعطوك الفرق كان ما عطوك قرض وصابك إللي صابنا/ وشّ صابكم؟ خبرك عقب ما عطونا الفرق مال كبار الموظفين بنينا ملاحق في البيت وهذا الكلام من خمسة وعشرين سنة يعني سنة ساحوت إللي يسمونها ما سمعت عنها وخبرك حنا ساكنين في مناطق ساحلية وفيها نسبة الرطوبة عالية؟ والله يا خوي بيوتنا قديمة والعائلة أكبرت والبعض عنده أكثر من زوجة وصارت بيوتنا مثل وجوه الممثلين كل فترة يضربونا بوتكس وينفخون ويشدون ولا فيه فائدة عقب ستة شهور اتفش النفاخة وهذي حال بيوتنا كل فترة نسوي لها صيانة وإذا كان العطار لايصلح ما أفسده الدهر فالمقاول لايصلح ما أفسدته الرطوبة والدهر في بيوتنا؟؟ ومثل ما أنت عارف حنا متقاعدين وعلى قد الحال من وين جيب مبلغ للصيانة كل سنة وكل شي زايد في البلد والأسعار نار وزادت عقب الزيادة الأخيرة وكلٍّ زاد أسعاره على كيفه؟ وأنتم ما شاء الله اخذتوا المناطق الزينة في الدوحة وقريبك المسؤول ما قصر معاك عطاك بدل الأرض أرضين وعطى كل عيالكم بعد وجاتكم الاستملاكات يعني عينتوا خير الله يزيدكم واحنا على حالنا؟!/ ليش ما اخذت حالك حال إللي خذوا؟ خبرك أنا ماعندي واسطة ويوم قدمت قالوا وقفنا مثل هذه المعاملات خبرك أخوك نحس عمري ما قدمت طلب ومشى كلة مرفوض أو يحفظ والبقرة الحلوب اللي كانت في ذيك الإدارة إللي كل من جاها مارحمها حلبها حلاب وخرج منها بالملايين وكم سجل له وكم بدل تحت أسماء مستعارة لكن عند الله بتطلع عليه أغلى من بيع السوق وللأسف جيتها بعد ماخلصوا حليبها ما لقيت نقطة وحده فيها!! إن زين ليش يا خوي ما قدمت على إدارة الإسكان؟/ يا أخي كلمناهم قالوا ما ينطبق عليكم القانون ليش ما يغيرونه يا أخي منزل من السماء؟ والله البلد فيها فائض ليش هالفائض ما يفيض علينا ويبني لنا بيوت خلونا نعيش باقي عمرنا في بيوت جديدة واسعة وصحية؟ وبعدين الحمد لله عندنا رواتب تقدر تغطي القسط ما احد يبقي شي ابلاش وإللي يخافون إنا نموت قبل مانسددها ترى الأعمار يا جماعة الخير بيد الله واحنا نشوف كرم حاتم الطائي مع الآخرين؟ لا وبعد يسبونكم ليل نهار مثل ما قالوا يا حبكم للغريب! لكن إللي نعرفه حق المعرفة مسؤولينا لكبار جزاهم الله خير إذا أحد عرض عليهم موضوع فيه مصلحة المواطنين ما يقصرون قصر الشر عنهم،، مش مرة في مقال سابق ناشدت الجهات المعنية بخصوص هالموضوع؟/ صح إذن اخوك ما تسمع من يهتم بالي نطرحه عبر الصحافة واحنا في نظرهم مجموعة املوصّة والمسؤولين يبون إللي يمدحهم والقانون هو الشماعة؟/ لا يا أخوي ألحين عندهم وزير جديد يمكن يضع حل لأصحاب البيوت القديمة إللي مثل حالتكم ويعطونكم قرض/ ليش لا يمكن يصير أو ينطرون ينزل عليهم وحي من السماء يغير القانون وإللي يبط الجبد تقول لي أنت طالع هنيه في البلد مثل الطرثوث من الأرض؟! وإذا شفت بيوت البعض من كانوا من المقيمين النخل إللي عند قصره وحديقته أكبر من بيتك بألف مرة؟!/ بس أسكت الله يرحم والديك لوَّعت بجبدي يا ليت يا أخي ما شفتك لايكون تبي تورطنا بهذا الكلام مع السلامة خلك مع طراثيثك خلهم ينفعونك؟! آخر الكلام صحيح ما علينا قاصر في هذا الوطن ولكن هناك بعض القوانين الوضعية لابد ما تواكب مصالح المواطنين وخاصة ما يتعلق بالمسكن فهو من الضروريات الملحة وبعدين بندفع الأقساط ما نبغي بالمجان مثل البعض وإن عطونا ببلاش ماهو غريب عنهم بنقول جزاهم الله خير في الدارين.