عجيب! عجيب

أمور غريبة عجيبة زاد ظهورها في مجتمعنا حتى أصبحت حديث اليوم والليلة، حدثت للبعض واعذروا الجمع بالطرح. سقناها بطريقة سهلة سلسة لنحاول بعدها وبعيداً عن المقال تعديل ما استطعنا إن أردنا. *عجيب! تغير مرحلة الطفولة من الإعدادية؟ اليهالوه صاروا كبار وهم في سن صغيرة. البنات ما خلو حواجب ولا صبغات ولا مكياج إلا حطوه، والأولاد السيقاير بيديهم والبعض بدأ المغازل! شفتوا لبسهم؟! لا تنسون الماركات صاروا ينافسون فيها الكبار، واقتحمت هالبراءة المقاهي والمطاعم ومواقع التواصل الأجتماعي، لا...وصار لهم لسان! أطفال بأشكال كبار...وين الأهل؟ من سمح لطمس الطفولة بهالسن الصغيرة؟ ووشو الهدف من هالتغيير وإعطاهم الأحساس بأنهم كبار وبطريقة خطأ؟ مفتقدين الحب من الأهل؟! وإلا نتاج الحب الكذب والحرية الخاطئة من المسلسلات والأفلام؟! وهاي حاط في بروفايله مجروح وذاك متعذب، وذي تحط لها قلب وسهوم ودموع يابلفيت مطعونة! لحقتوا؟! وهياته بالمولات مع منهم بعمرهم. *عجيب! سالفة قيرل فرند وبوي فرند بالمدارس الأجنبية. تهقون بعد كمن سنة بتزيد طلبات للجنة تنظيم الزواج لطلب الموافقة؟! بعد محلي داخلي أفضل. نسأل الله السلامة والعافية.*عجيب! معاريس ويهدها من ثاني يوم طالع مع ربعه، وباقي السنين آخر الأسبوع لربعه! والزوجه بروحها وإلا بعيالها عند أهلها أو مع ربعها.*عجيب! تبلد عواطف المرأة وجرأتها على زوجها بسبب/بالمقابل تخلي الرجل عن مسؤولية بيته، وبرا متسخر لكل خلق الله.*عجيب! الزوج والمرأة يشتغلون، يردون يتغدون، هو يرقد وهي تجابل تدريس اليهال، هو يقعد المغرب ويطلع،وهي تطلع تجيب أغراض البيت، ترجع تلقى الياهل تعبان وتتصل بالأبو:والله عيزان وتعبان،توديه الأم وترجع الساعة وحدة بالليل منهده ويالله تلحفت ورقدت، وهو عقبها بساعة داش يقعدها...وأيام ألا ويشتكي مافي حب، تبلد، مافي رومانسية!*عجيب! الزوج ومرته بالجمعية ويترس وياها الجاري،وعند الدفع هي اللي تدفع وهو إما يحط الأغراض بالأكياس ويا العامل أو واقف وراها يتلفت يمين ويسار..حليله والله!*عجيب! زوج يسافر للدراسة وزوجته تقعد في بيت أهلها عشان وظيفتها بس. وعجيب! الزوج يسافر بروحه لأسبوع،وهي تسافر بروحها لأسبوع، حتى يردون لبعض منتعشين، حشى أنجليز مب مسلمين! وعجيب سفر الزوج مع ربعه والمرأه مع أهلها أو ربعها للاستجمام! *عجيب! بعض الريايل من كثرة حنة حريمهم يخلونهم على كيفهم حتى لا تطحن على رأسه وتعور قلبه! تبي شيء يسويه لها، طلب يعطيها وينفذه لها على طول. لا ويزعل على ناس لأنهم ما دشوا مزاجها! *عجيب! زوجه تطلع وتدخل ولا يدري عنها زوجها وين تروح ومتى تجي؟! ما تُفتن المرأة مثل الرجل؟ ومافي حقوق وواجبات شرعية للزوج ومن حقه يلقاها ومن واجبها تسويها له وإلا لا؟!*عجيب! بعض الأزواج تفرقوا وصار لكل منهم غرفة نوم خاصة فيه، ولا يتلاقون إلا وقت الحاجة، وين السكينة والمودة والرحمة والإحساس بالأمان!؟ *عجيب! المواعد بين الجنسين صار عادي،والمصيبة لما يكون الطرفين متزوجين! ويتخشخشون من الناس ونسوا رب الناس!همسة من القلب:كفى ما نسمع وما نرى،وهذه دعوة لنرجع للأصالة وللنقاء ولطهارة النفس وللعزة وللعفة وللرفعة والكرامة، وكلها تتجلى في ديننا وأخلاقياته، ولنأخذ من تطور هذا الزمان وحضارته وعلمه فقط.دمتم في حفظ الله ورعايته