المسلم الوحيد

هذا حوار طريف بين أبو صالح وأبو راشد عن الإسلام والمسلمين وهما يتابعان نشرة الأخبار في التلفزيون في بلدتهما. ‎أبو راشد - وش قاعد تفكر فيه يا أبو صالح؟ ‎أبو صالح - أفكر بهذا الدين العظيم اللي انتشر من أقصى الأرض إلى أقصاها. ‎ناظر هالمسلمين الصينيين. ‎- والله أنك صادق يا أبو صالح. ‎- بس ترى هذول ما يعرفون من الدين إلا القشور. طبايعهم زي الأجانب، بس يصلون. المسلمون الصدق هم العرب اللي يفهمون القرآن والأحاديث. ‎والله أنك صادق يا أبو صالح. ‎- وبعد ترى موب كل العرب مسلمين صحيحين. بعضهم والله حتى ما يصلون صلاة ربي. ‎إن بغيت المسلمين الصدق تراهم أهل الجزيرة والخليج. ‎- والله أنك صادق يا أبو صالح. ‎- وموب بعد كل الخليج. ترى فيه دول تسمح بالخمر، الدين الصدق هو عندنا بس. ‎- والله أنك صادق يا أبو صالح. ‎- بس عندنا بعض الحريم ما يغطون وجيهم، وبعض المناطق يشيشون وينتنون. ‎الدين الصدق موجود هنيه في بلدتنا بس. ‎- والله أنك صادق يا أبو صالح. ‎- بس ترى بلدتنا يسمعون موسيقى والعياذ بالله. الدين الصدق بس في حارتنا. ‎- والله أنك صادق يا أبو صالح. ‎- بس بعد في الحارة مركبين دشوش ويشوفون القنوات الماجنة. ما فيه غير بيتي وبيتك وجيرانا. ‎- والله أنك صادق يا أبو صالح. ‎- بس الله يهديهم جيراننا موب دايم تشوف عيالهم في المسجد، ولا تشوفهم دايم في صلاة الفجر. الصراحة يا بو راشد ما فيه في الحارة يصلون الفجر دايم في المسجد إلا أنا وانت. ‎- والله أنك صادق يا أبو صالح. ‎بس أشوفك يا بو راشد هالأيام ما تخشع زين في صلاة الفجر!.