حلم خاص جدا

قلت لنفسي أبي حلم خاص جدا ، الظاهر الأحلام على مزاجي و أنا لا أعرف المهم قرأت الأذكار ونمت على بركة الله بعد دقائق شفت نفسي شاب صغير رجعت  30 سنة  ورا  لحيه خفيفه وشارب توها طالعه جاس على كرسي وأمامي طاولة عليها أوراق ، أنا لحد الأن مو مستوعب هذا الحلم والجو حار ما في مكيف أنا وين نظرت حولي وإذ بشباب مثل سني جالسين مثلي ومعاهم أوراق يكتبون فيها ما وعيت إلا واحد وافق على راسي يقول لي  ما تحل يا بني إنت مش مزاكر ولا ايه  اللحين عرفت الحلم أنا في إمتحان الثانوية العامه في بداية الثمانينات لا مكيفات ولا كمبيوترات ولا مدارس مستقلة ولا امتحانات وطنية خلت إعيالنا مثل المجانين ما يعرفون  وين يطقون بروسهم ، خلص الإمتحان لا تفشل عمرك مسكت الاوراق وحاولت أحل  إمتحان الانجليزي واخوكم كان خبير في الانجليزية مثل خبرته باللغة الصينية ، لكني كنت جاد حاولت أجاوب على الأسئلة  اتعرفون فشيله جدام الطلاب يشوفوني ما أكتب ،كنت مركز وايد في الامتحان قمت من النوم على صوت المدرس أنتهى الوقت يلا  سلموا أوراق الامتحان بسرعة ، غسلت ويهي ورحت المطبخ علشان اتسحر وأنا أقول الحمد لله أمتحاناتنا القديمه أرحم بمليون مرة من هذه الأيام عندنا منهج واضح و كتب ندرس منها وكنا نحترم المدرسين اللي الحين صاروا ملطشة للي يسوى واللي ما يسوى والله العظيم كاسرين خاطري الله يصبرهم ويثبتهم  آميـــــــــــــــن.