المسلم الوحيد

هذا حوار طريف بين أبو صالح وأبو راشد عن الإسلام والمسلمين وهما يتابعان نشرة الأخبار في التلفزيون في بلدتهما. أبو راشد: وش قاعد تفكر فيه يا بو صالح؟ أبو صالح: أفكر بهالدين العظيم اللي انتشر من أقصى الأرض إلى أقصاها. ناظر هالمسلمين الصينيين. - والله أنك صادق يا بو صالح. - بس ترى هذول ما يعرفون من الدين إلا القشور. طبايعهم زي الأجانب، بس يصلون. المسلمين الصدق هم العرب اللي يفهمون القرآن والأحاديث. والله أنك صادق يابو صالح. - وبعد ترى موب كل العرب مسلمين صحيحين. بعضهم والله حتى ما يصلون صلاة ربي. ان بغيت المسلمين الصدق تراهم أهل الجزيرة والخليج. - والله أنك صادق يابو صالح. - وموب بعد كل الخليج. ترى فيه دول تسمح بالخمر، الدين الصدق هو دين أهل السعودية. - والله أنك صادق يابو صالح. - بس عندك بعد مناطق بالسعودية حريمهم ما يغطون وجيهم، وبعض المناطق يشيشون ويتتنون وبعض المناطق عندهم بدع. - الدين الصدق موجود هنيه عندنا. - والله أنك صادق يابو صالح. - بس ترى بلدتنا يسمعون موسيقى والعياذ بالله. الدين الصدق بس في حارتنا. - والله أنك صادق يابو صالح. - بس بعد في الحارة مركبين دشوش ويشوفون القنوات الماجنة. ما فيه غير بيتي وبيتك وجيرانا. - والله أنك صادق يابو صالح. - بس الله يهديهم جيراننا موب دايم تشوف عيالهم في المسجد، ولا تشوفهم دايم في صلاة الفجر. الصراحة يا بو راشد ما فيه في الحارة يصلون الفجر دايم في المسجد إلا أنا وانت. - والله أنك صادق يابو صالح. بس أشوفك يا بو راشد هالأيام ما تخشع زين في صلاة الفجر!!! [email protected]